Мэдээ:
  • Төрөлт: Улсын хэмжээнд 2019 оны жилийн эцсийн байдлаар 77 601 эх төрсөн нь өнгөрсөн оны мөн үеэс 543 төрөлтөөр буюу 0.7 хувиар өссөн байна. Амьд төрсөн хүүхэд: 2019 оны жилийн эцсийн байдлаар улсын хэмжээнд 78 223 хүүхэд амьд төрсөн нь өнгөрсөн оны мөн үеэс 695 хүүхдээр буюу 0.9 хувиар өсчээ. Төрөлтийн түвшин 1000 хүн амд 24.8 байна. Эхийн эндэгдэл: Улсын хэмжээнд 2019 оны жилийн эцсийн байдлаар эхийн эндэгдлийн 18 тохиолдол бүртгэгдэж, 100 000 амьд төрөлтөд 23.0 байна. Өнгөрсөн оны мөн үеэс 3 төрөлтөөр буюу 100 000 амьд төрөлтөд 4.1-оор буурсан байна. Нялхсын эндэгдэл: Улсын хэмжээнд 2019 оны жилийн эцсийн байдлаар нялхсын эндэгдлийн 1041 тохиолдол бүртгэгдэж, 1000 амьд төрөлтөд 13.3 ногдож байна. Өнгөрсөн оны мөн үетэй харьцуулахад 4 тохиолдлоор нэмэгдсэн хэдий ч 1000 амьд төрөлтөд 0.1-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны жилийн эцсийн байдлаар тав хүртэлх насны хүүхдийн эндэгдлийн 1263 тохиолдол бүртгэгдэж, 1000 амьд төрөлтөд 16.1 ногдож байгаа нь өмнөх оны мөн үетэй харьцуулахад 47 тохиолдлоор буюу 1000 амьд төрөлтөд 0.8-оор буурсан байна. Нас баралт: 2019 оны жилийн эцсийн байдлаар улсын хэмжээнд нас баралтын 17 205 тохиолдол бүртгэгдсэн нь өнгөрсөн оны мөн үеэс 126 тохиолдлоор буурсан байна. Нийт нас баралтын 10 515 тохиолдол буюу 61.1 хувь нь эрэгтэй, 6690 буюу 38.9 хувь нь эмэгтэй байна. Халдварт өвчин: Улсын хэмжээнд 2019 оны жилийн эцсийн байдлаар 28 төрлийн 45 232 халдварт өвчний тохиолдол бүртгэгдэж, 10 000 хүн амд 139.7 ногдож байна. Өмнөх оны мөн үеэс 3158 тохиолдлоор буюу 10 000 хүн амд ногдох өвчлөл 7.3-оор нэмэгдсэн байна.
ЭМСЯ-ны ТНБД С.Ламбаа аймгуудтай цахим хурал хийлээ

Дэлхий дахинаа  томуугийн H1N1  вирусээр үүсгэгдсэн  өвчлөл  зонхилж байгаа өнөө үед манай улсад гуравдугаар долоо хоногт нийт 133.802 хүн амбулториор үйлчлүүлсний 6.781 хувь нь томуу, томуу төст өвчтэй гэж оношлогдсон байна.  Үүнээс уушигны үрэвсэл ба  амьсгалын замын  цочмог хүнд  халдварын шалтгаантай  эмнэлэгт хэвтэгсэд  10-15 хувийг эзэлж байна.  Тиймээс өнөөдөр  Эрүүл мэнд, спортын яамны удирдлагууд 21 аймгийн Эрүүл мэндийн төвүүд, Нийслэлийн эрүүл мэндийн газрууд, ХӨСҮТ-тэй “Цахим”-аар нэгэн зэрэг холбогдож  цаг үеийн мэдээллийг сонсож цаашид авч хэрэгжүүлэх ажлын талаар үүрэг чиглэл өглөө. 

 

  Ихэнх аймгуудын хувьд томуу, томуу төст өвчний өвчлөл их, алсын дуудлага ихэссэн талаар мэдээлж байлаа. Мөн өвөлжилт хүндэрсэн аймгуудад  отроор өвөлжиж байгаа малчин ард иргэдэд эрүүл мэндийн тусламж үйлчилгээг хүргэхэд хамгийн тулгамдаж байгаа асуудал нь  Эмнэлгийн түргэн тусламжийн машины асуудал байв. Өвөрхангай аймгийн хувьд салхин цэцэг өвчин ихсэх хандлагтай өнөөдрийн байдлаар 28 хүн  өвчлөөд байгаа бол, томуугийн өвчлөл Сүхбаатар аймагт хамгийн өндөр амбулторийн үзлэгийн 10-аас дээш  хувийг эзэлж,  дүүргүүдийн хувьд  Багахангай  дүүрэг  есөн хувьтай байна.  

 Цахим хурлын үеэр анх удаа сумдаас Увс аймгийн Баруунтуруун сум  холбогдож  эмнэлгийн түргэн тусламжийн машиныхаа асуудлаа шийдвэрлүүлэв.

     Ийнхүү бүх аймаг, дүүргүүдтэй  цахимаар холбогдож мэдээлэл  авсны дараа Төрийн нарийн бичгийн дарга С.Ламбаа хэлэхдээ “Цаг хугацаа, зардал хэмнэсэн  бие биедээ  мэдээллийг нэгэн зэрэг  шуурхай дамжуулсан  алхамыг хийж чадлаа.  Ихэнх аймаг сумдын хувьд эмнэлгийн тендер хоцорч байгаа, мөн эмнэлгийн тусламж үйлчилгээний автомашины асуудал яригдаж байна. Энэ онд салбарын төсөвт түргэн тусламжийн машиныг шийдвэрлэхэд зориулж нэг ч төгрөг батлагдаагүй учраас ойрын хугацаанд асуудал боловсруулан Засгийн газрын хуралдаанд оруулахаар ажиллаж байна. Саяхан Улсын онцгой комиссын хуралдаанд оруулж Засгийн газрын нөөц хөрөнгөөс 20 автомашины асуудлыг   шийдвэрлэж орон нутагт хүргүүлээд байна” гэсэн юм.

     Мөн энэ үеэр  уламжлалт сар шинийн баяр ойртож буйтай холбогдуулан эмнэлгийн тусламж үлйчилгээнд онцгойлон анхаарч, ялангуяа сар шинийн амралтын өдрүүдэд  хүнд өвчтөн, төрхийн хяналтанд байгаа  эхчүүдэд  анхаарлаа хүчтэй хандуулах, эмнэлэг хооронд шилжүүлэхдээ чирэгдүүлэхгүй байх, шаардалагтай тохиолдолд  эмч нарын зөвлөгөөнийг шуурхай зохион байгуулах,  төрөлжсөн том эмнэлгүүдээс  хөдөө орон нутаг, алслагдсан хүн амд  үзүүлэх алсын дуудлагын үйлчилгээний  бэлэн байдлыг хангах, шатахууныг хангалттай хэмжээгээр нөөцлөх, нийтийг хамарсан  хордлого, осол гэмтэл  халдварт өвчний дэгдэлт  болон эмнэлгийн  тусламж үйлчилгээний  ноцтой алдаа зөрчил  гарсан үед ЭМСЯ-ны хариуцлагатай жижүүрт шууд мэдээлэх, эмнэлгийн тусламж үйлчилгээ, амьсгалын замын дутагдалтай өвчтөнүүдэд шаардлагатай эм бэлдмэл, аппарат, тоног төхөөрөмж, вирусийн эсрэг  эмийн нөөцийг нэмэгдүүлэн  ажиллахыг үүрэг  болгов.

    Мөн  Эрүүл мэнд, спортын сайдын гаргасан  “Сахилга хариуцлага”-ыг сайжруулах 449 дүгээр тогтоолын хэрэгжилтэд анхаарч ажиллахыг сануулж, бидний хариуцлагаас  ихээхэн зүйл шалтгаалах болохыг  анхааруулсан юм.  2016 оныг Монгол Улсын Засгийн газраас “Хэрэглэгчийн жил” болгон зарласантай холбогдуулан  хэрэглэгчдийн эрх ашигт нийцүүлэн үйл ажиллагаагаа  явуулах нь та бидний хамтын ажиллагаанаас ихээхэн шалтгаална гэдгийг  Цахим хурлын төгсгөлд хэллээ.