Мэдээ:
  • Төрөлт: Улсын хэмжээнд 2019 оны эхний 11 сарын байдлаар 71 046 эх төрсөн нь өнгөрсөн оны мөн үеэс 527 төрөлтөөр буюу 0.7 хувиар өссөн байна. Амьд төрсөн хүүхэд: 2019 оны эхний 11 сарын байдлаар улсын хэмжээнд 71 622 хүүхэд амьд төрсөн нь өнгөрсөн оны мөн үеэс 662 хүүхдээр буюу 0.9 хувиар өсчээ. Төрөлтийн түвшин 1000 хүн амд 22.7 байна. Амьд төрсөн хүүхдийн 36 743 буюу 51.3 хувь нь хүү, 34 879 буюу 48.7 хувь нь охин байна. Эхийн эндэгдэл: Улсын хэмжээнд 2019 оны эхний 11 сарын байдлаар эхийн эндэгдлийн 18 тохиолдол бүртгэгдэж, 100 000 амьд төрөлтөд 25.1 байгаа нь өнгөрсөн оны мөн үетэй ижил хэдий ч 100 000 амьд төрөлтөд 0.3-оор буурсан байна. Нялхсын эндэгдэл: Улсын хэмжээнд 2019 оны эхний 11 сарын байдлаар нялхсын эндэгдлийн 941 тохиолдол бүртгэгдэж, 1000 амьд төрөлтөд 13.1 ногдож байгаа нь өнгөрсөн оны мөн үетэй харьцуулахад 1 тохиолдлоор буюу 1000 амьд төрөлтөд 0.2-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны эхний 11 сарын байдлаар тав хүртэлх насны хүүхдийн эндэгдлийн 1136 тохиолдол бүртгэгдэж, 1000 амьд төрөлтөд 15.9 ногдож байгаа нь өмнөх оны мөн үетэй харьцуулахад 53 тохиолдлоор буюу 1000 амьд төрөлтөд 0.9-оор буурсан байна. Нас баралт: 2019 оны эхний 11 сарын байдлаар улсын хэмжээнд нас баралтын 15531 тохиолдол бүртгэгдсэн нь өнгөрсөн оны мөн үеэс 191 тохиолдлоор буурсан байна. Нийт нас баралтын 9499 тохиолдол буюу 61.2 хувь нь эрэгтэй, 6032 буюу 38.8 хувь нь эмэгтэй байна. Халдварт өвчин: Улсын хэмжээнд 2019 оны эхний 11 сарын байдлаар 28 төрлийн 39 553 халдварт өвчний тохиолдол бүртгэгдэж, 10 000 хүн амд 122.1 ногдож байна. Өмнөх оны мөн үеэс 2045 тохиолдлоор буюу 10 000 хүн амд ногдох өвчлөл 4.1-оор нэмэгдсэн байна.
Бүсийн оношилгоо, эмчилгээний төвийн Эмнэл зүйн сургагч багш нар Япон улсад суралцана.

Эмнэлгийн мэргэжилтний төгсөлтийн дараах сургалтын үйл ажиллагаанд Япон Улсын эмнэл зүйн сургалтын туршлагаас нэвтрүүлэх, нутагшуулах зорилгоор Дорнод, Өвөрхангай, Өмнөговь, Ховд, Орхон аймгийн Бүсийн оношилгоо, эмчилгээний төвд “Ерөнхий мэргэшил судлал”-ын үндсэн мэргэшлийн сургалт явуулах бэлтгэлийг хангах үүднээс бүсийн оношилгоо, эмчилгээний төвийн эмч, Эмнэл зүйн сургагч багш нарыг 2019 оны 11-12 сард 2 ээлжээр Япон улсад Эмнэл зүйн туршлага судлах сургалтад суралцуулах гэж байна.

Энэ удаагийн сургалт нь Эрүүл мэндийн яам, Японы улсын хамтын ажиллагааны нийгэмлэг /ЖАЙКА/-тэй хамтран хэрэгжүүлж буй “Монгол Улсын анхан ба хоёр дахь шатлалын эмнэлгийн мэргэжилтний төгсөлтийн дараахь сургалтыг сайжруулах нь” төслийн хүрээнд Япон Улсын Токио хот дах Олон Улсын Эрүүл мэнд, Нийгэм Хамгааллын Их сургуульд зохион байгуулагдана.

Дээрх төслийн хүрээнд сургалт эрхлэх байгууллагын төгсөлтийн дараах сургалтыг зохион байгуулах чадавхийг сайжруулах, эмнэл зүйн сургагч багш нарын ур чадвар, мэдлэгийг дээшлүүлэх, сувилагчийн төгсөлтийн дараах сургалтыг зохион байгуулах чадавхийг сайжруулах,  Япон Улсын төгсөлтийн дараах сургалтыг туршлагыг нэвтрүүлэх, нутагшуулах зорилгоор 2018 оноос хойш 38 эмч, эмнэлгийн мэргэжилтнүүдийг Япон улсад  сургалтад хамруулаад байна.