Мэдээ:
  • Төрөлт: Улсын хэмжээнд 2019 оны эхний 11 сарын байдлаар 71 046 эх төрсөн нь өнгөрсөн оны мөн үеэс 527 төрөлтөөр буюу 0.7 хувиар өссөн байна. Амьд төрсөн хүүхэд: 2019 оны эхний 11 сарын байдлаар улсын хэмжээнд 71 622 хүүхэд амьд төрсөн нь өнгөрсөн оны мөн үеэс 662 хүүхдээр буюу 0.9 хувиар өсчээ. Төрөлтийн түвшин 1000 хүн амд 22.7 байна. Амьд төрсөн хүүхдийн 36 743 буюу 51.3 хувь нь хүү, 34 879 буюу 48.7 хувь нь охин байна. Эхийн эндэгдэл: Улсын хэмжээнд 2019 оны эхний 11 сарын байдлаар эхийн эндэгдлийн 18 тохиолдол бүртгэгдэж, 100 000 амьд төрөлтөд 25.1 байгаа нь өнгөрсөн оны мөн үетэй ижил хэдий ч 100 000 амьд төрөлтөд 0.3-оор буурсан байна. Нялхсын эндэгдэл: Улсын хэмжээнд 2019 оны эхний 11 сарын байдлаар нялхсын эндэгдлийн 941 тохиолдол бүртгэгдэж, 1000 амьд төрөлтөд 13.1 ногдож байгаа нь өнгөрсөн оны мөн үетэй харьцуулахад 1 тохиолдлоор буюу 1000 амьд төрөлтөд 0.2-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны эхний 11 сарын байдлаар тав хүртэлх насны хүүхдийн эндэгдлийн 1136 тохиолдол бүртгэгдэж, 1000 амьд төрөлтөд 15.9 ногдож байгаа нь өмнөх оны мөн үетэй харьцуулахад 53 тохиолдлоор буюу 1000 амьд төрөлтөд 0.9-оор буурсан байна. Нас баралт: 2019 оны эхний 11 сарын байдлаар улсын хэмжээнд нас баралтын 15531 тохиолдол бүртгэгдсэн нь өнгөрсөн оны мөн үеэс 191 тохиолдлоор буурсан байна. Нийт нас баралтын 9499 тохиолдол буюу 61.2 хувь нь эрэгтэй, 6032 буюу 38.8 хувь нь эмэгтэй байна. Халдварт өвчин: Улсын хэмжээнд 2019 оны эхний 11 сарын байдлаар 28 төрлийн 39 553 халдварт өвчний тохиолдол бүртгэгдэж, 10 000 хүн амд 122.1 ногдож байна. Өмнөх оны мөн үеэс 2045 тохиолдлоор буюу 10 000 хүн амд ногдох өвчлөл 4.1-оор нэмэгдсэн байна.
Эрүүл мэндийн статистикч эмч нарт зориулсан “Нотолгоонд суурилсан шийдвэр гаргалтыг дэмжих нь” сур

Эрүүл мэндийн хөгжлийн төв нь Дэлхийн банкны санхүүжилттэй “Цахим эрүүл мэнд” төсөлтэй хамтран Эрүүл мэндийн статистикч эмч нарт зориулсан “Нотолгоонд суурилсан шийдвэр гаргалтыг дэмжих нь” сургалтыг 2019 оны 11 дүгээр сарын 14,15-ны өдөр  зохион байгуулж байна.

Уг сургалтад 21 аймаг, нийслэлийн  Эрүүл мэндийн газар, нэгдсэн эмнэлэг, ЭМЯ-ны харьяа Тусгай мэргэжлийн төв, төрөлжсөн мэргэшлийн эмнэлгүүдийн нийт 90 мэдээллийн мэргэжилтэн-статистикч эмч нар оролцож байна.

Сургалтын гол зорилго нь Эрүүл мэндийн мэдээллийн мэргэжилтэн, статистикч эмч нарын цахим эрүүл мэндийн статистикийн чиглэлээр хэрэгжиж буй олон улсын стандарт, цахим эрүүл мэндийн тогтолцоо, нотолгоонд суурилсан шийдвэр гаргахад шаардагдах мэдээ, мэдээллийг нэгтгэх, дүгнэх, боловсруулах мэдлэг чадавхыг дээшлүүлж, Тогтвортой хөгжлийн зорилгын үндэсний түвшний эрүүл мэндийн үзүүлэлтүүд, тооцоолох аргачлалыг танилцуулах юм.

Эрүүл мэндийн мэдээллийн чиглэлээр ажиллаж буй эмч, мэргэжилтнүүдийн цахим эрүүл мэндийн талаарх мэдлэгийг дээшлүүлж, эрүүл мэндийн мэдээлэл цахим хэлбэрт шилжих бэлтгэл ажлыг хангахад дэмжлэг үзүүлэх юм.

 Сургалтыг нээж ЭМЯ-ны Төрийн нарийн бичгийн даргын албан үүргийг түр орлон гүйцэтгэгч Я.Амаржаргал үг хэлсэн ба Эрүүл мэндийн мэдээллийн мэргэжилтэн, статистикч эмч нарын мэдлэг, мэргэшлийг дээшлүүлэх, тулгамдаж буй асуудлуудыг цаашид анхааралдаа авч ажиллах талаар дурьдлаа.

Мөн ЭМЯ-ны Бодлого төлөвлөлтийн газрын дарга Р.Оюунханд “Эрүүл мэндийн салбарын хөгжлийн бодлого, тогтолцооны шинэчлэл” илтгэл танилцуулж, эмч нарын асуултад хариулж, тулгамдаж буй асуудлыг шийдвэрлэхэд дэмжлэг үзүүлэн ажиллана гэдгээ илэрхийллээ.