Мэдээ:
  • Төрөлт: Улсын хэмжээнд 2019 оны эхний 10 сарын байдлаар 64 769 эх төрсөн нь өнгөрсөн оны мөн үеэс 657 төрөлтөөр буюу 1.0 хувиар өссөн байна. Амьд төрсөн хүүхэд: 2019 оны эхний 10 сарын байдлаар улсын хэмжээнд 65 270 хүүхэд амьд төрсөн нь өнгөрсөн оны мөн үеэс 754 хүүхдээр буюу 1.2 хувиар өсчээ. Төрөлтийн түвшин 1000 хүн амд 20.7 байна. Амьд төрсөн хүүхдийн 33 460 буюу 51.3 хувь нь хүү, 31 810 буюу 48.7 хувь нь охин байна. Эхийн эндэгдэл: Улсын хэмжээнд 2019 оны эхний 10 сарын байдлаар эхийн эндэгдлийн 15 тохиолдол бүртгэгдэж, 100 000 амьд төрөлтөд 23.0 байгаа нь өнгөрсөн оны мөн үетэй ижил хэдий ч 100 000 амьд төрөлтөд 0.3-оор буурсан байна. Нялхсын эндэгдэл: Улсын хэмжээнд 2019 оны эхний 10 сарын байдлаар нялхсын эндэгдлийн 855 тохиолдол бүртгэгдэж, 1000 амьд төрөлтөд 13.1 ногдож байгаа нь өнгөрсөн оны мөн үетэй харьцуулахад 11 тохиолдлоор буюу 1000 амьд төрөлтөд 0.3-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны эхний 10 сарын байдлаар тав хүртэлх насны хүүхдийн эндэгдлийн 1031 тохиолдол бүртгэгдэж, 1000 амьд төрөлтөд 15.8 ногдож байгаа нь өмнөх оны мөн үетэй харьцуулахад 58 тохиолдлоор буюу 1000 амьд төрөлтөд 1.1-оор буурсан байна. Нас баралт: 2019 оны эхний 10 сарын байдлаар улсын хэмжээнд нас баралтын 14 265 тохиолдол бүртгэгдсэн нь өнгөрсөн оны мөн үеэс 96 тохиолдлоор буурсан байна. Нас баралтын түвшин 1000 хүн амд 4.5 байна. Халдварт өвчин: Улсын хэмжээнд 2019 оны эхний 10 сарын байдлаар 28 төрлийн 36 030 халдварт өвчний тохиолдол бүртгэгдэж, 10 000 хүн амд 111.3 ногдож байна. Өмнөх оны мөн үеэс 1732 тохиолдлоор буюу 10 000 хүн амд ногдох өвчлөл 3.4-оор нэмэгдсэн байна.
ЭМНЭЛГИЙН ҮЙЛЧИЛГЭЭНИЙ АЖИЛТНУУДЫГ ЧАДАВХЖУУЛАХ СУРГАЛТ ЗОХИОН БАЙГУУЛЛАА

Эрүүл мэндийн яамнаас дэвшүүлэн ажиллаж байгаа “1:2” зорилт нь 2018 оноос хэрэгжиж байгаа бөгөөд уг хөтөлбөрийн хүрээнд ЭМЯ, ЭМХТ, АШУҮИС-ийн Сувилахуйн сургууль хамтран анх удаа 23 эрүүл мэндийн байгууллагын 60 эмнэлгийн үйлчилгээний ажилтнуудыг хамруулан сургалт зохион байгууллаа.

Тус сургалтын нээлтэд Эрүүл мэндийн яамны Төрийн захиргааны удирдлагын газрын дарга Б.Цогтбаатар, Бодлого төлөвлөлтийн газрын ахлах мэргэжилтэн С.Эрдэнэтуяа, Эрүүл мэндийн хөгжлийн төвийн Хүний нөөцийн бодлого зохицуулалтын албаны дарга Н.Сэвжид нар оролцлоо.

Энэхүү сургалтад оролцсоноор Эрүүл мэндийн ажилтны ёс зүй, харилцаа хандлага, амилуулах суурь тусламж, эрүүл мэндийн байгууллагын халдвараас сэргийлэх ур чадварт суралцах юм. Сургалтыг эрүүл мэндийн байгууллагын эмч, сувилагч нарыг чадавхжуулах сургалтын үндэсний хэмжээний сургагч багш нар удирдаж байгаа бөгөөд онол дадлага хослуулан зохион байгуулж байна.

Сургалтын өмнөх ба дараах харьцуулсан тестээр амьлуулах суурь тусламжийн мэдлэг 35-95 хувь, ёс зүйн мэдлэг 65-80 хувь болж нэмэгдсэн байгаа нь сургалтын ач холбогдол, үр өгөөжийг илтгэж байна.

Цаашид эмнэлгийн үйлчилгээний ажилтны сургалтыг тогтмолжуулах, хөдөлмөрийн аюулгүй байдал, эрүүл ахуй аюулгүй байдал, халдвар хамгааллын чиглэлийн сургалтыг тогтмол зохион байгуулах тал дээр эрүүл мэндийн байгууллагагуудтай хамтран ажиллах нь зүйтэй болох нь сургалтаас харагдлаа.