Мэдээ:
  • Төрөлт: Улсын хэмжээнд 2019 оны эхний 9 сарын байдлаар 58 081 эх төрсөн нь өнгөрсөн оны мөн үеэс 488 төрөлтөөр буюу 0.8 хувиар өссөн байна. Амьд төрсөн хүүхэд: 2019 оны эхний 9 сарын байдлаар улсын хэмжээнд 58 525 хүүхэд амьд төрсөн нь өнгөрсөн оны мөн үеэс 563 хүүхдээр буюу 1.0 хувиар өсчээ. Амьд төрсөн хүүхдийн 29 978 буюу 51.2 хувь нь хүү, 28 547 буюу 48.8 хувь нь охин байна. Эхийн эндэгдэл: Улсын хэмжээнд 2019 оны эхний 9 сарын байдлаар эхийн эндэгдлийн 13 тохиолдол бүртгэгдэж, 100 000 амьд төрөлтөд 22.2 байгаа нь өнгөрсөн оны мөн үетэй ижил хэдий ч 100 000 амьд төрөлтөд 0.2-оор буурсан байна. Нялхсын эндэгдэл: Улсын хэмжээнд 2019 оны эхний 9 сарын байдлаар нялхсын эндэгдлийн 771 тохиолдол бүртгэгдэж, 1000 амьд төрөлтөд 13.2 ногдож байгаа нь өнгөрсөн оны мөн үетэй харьцуулахад 24 тохиолдлоор буюу 1000 амьд төрөлтөд 0.5-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны эхний 9 сарын байдлаар тав хүртэлх насны хүүхдийн эндэгдлийн 930 тохиолдол бүртгэгдэж, 1000 амьд төрөлтөд 15.9 ногдож байгаа нь өмнөх оны мөн үетэй харьцуулахад 62 тохиолдлоор буюу 1000 амьд төрөлтөд 1.2-оор буурсан байна. Нас баралт: 2019 оны эхний 9 сарын байдлаар улсын хэмжээнд нас баралтын 12 723 тохиолдол бүртгэгдсэн нь өнгөрсөн оны мөн үеэс 177 тохиолдлоор буурсан байна. Нийт нас баралтын 7724 тохиолдол буюу 60.7 хувь нь эрэгтэй, 4999 буюу 39.3 хувь нь эмэгтэй байна. Халдварт өвчин: Улсын хэмжээнд 2019 оны эхний 9 сарын байдлаар 27 төрлийн 32 275 халдварт өвчний тохиолдол бүртгэгдэж, 10 000 хүн амд 99.7 ногдож байна. Өмнөх оны мөн үеэс 1168 тохиолдлоор буюу 10 000 хүн амд ногдох өвчлөл 1.8-оор нэмэгдсэн байна.
Эрүүл мэндийн салбарын Хөдөлмөрийн яармаг-2019

“Эрүүл мэндийн ажилтны нийгмийн хамгааллын үндэсний хөтөлбөр”-ийн хэрэгжилтийг хангах зорилгоор эрүүл мэндийн салбарын хэмжээнд зохион байгуулагдаж байгаа эрүүл мэндийн ажилтны нийгмийн хамгааллыг дэмжих сарын аяны хүрээнд, эрүүл аюулгүй ажлын байр бүхий дэмжлэгт орчин бүрдүүлэх, эрүүл мэндийн байгууллагын сул ажлын байрыг олон нийтэд мэдээллэх, сурталчлах зорилгоор өнөөдрийн арга хэмжээг зохион байгуулж байна.

ЭМЯ, ЭМХТ, Нийслэлийн хөдөлмөрийн газар, Төрийн бус байгууллагууд, төр хувийн хэвшлийн эрүүл мэндийн байгууллагуудтай хамтран, салбар хоорондын хамтын ажиллагаанд тулгуурлан зохион байгуулж байгаагаараа өнөөдрийн арга хэмжээ онцлогтой юм. 

              Эрүүл мэндийн салбарт ажиллагсдын тоо 2017 онтой харьцуулахад 2018 онд 3,5 хувиар ихэссэн, өөрөөр хэлбэл 4300 эрүүл мэндийн байгууллагад 52300 эрүүл мэндийн ажилтан ажиллаж байгаагаас гадна анагаах ухааны боловсрол олгогч төр болон хувийн хэвшлийн 16 их дээд сургуулийг 2019 онд 3500 орчим эмч эмнэлгийн мэргэжилтнүүд төгсөн гарч байна.

                  Хөдөлмөрийн яармаг-2019 арга хэмжээний хүрээнд хүрээнд нийслэлийн 37 эрүүл мэндийн байгууллага, хөдөө орон нутгийн 126 эрүүл мэндийн байгууллагаас 264 сул ажлын байрны мэдээлэл ирсэн ба дүрс оношлогооны эмч, дотрын эмч,  сувилагч мэргэжлийн сул ажлын байр хамгийн их байна.

                Өнөөдрийн арга хэмжээнд Японы олон улсын хамтын ажиллагааны Жайка байгууллагатай хамтран анх удаа зохион байгуулсан  “Ерөнхий мэргэшил судлал’’  сургалтыг төгссөн 19 төгсөгч дипломоо гардан авч байгаа бөгөөд цаашид эдгээр төгсөгчид маань эрүүл мэндийн салбарт нэн шаардлагатай байгаа ажлын байранд ялангуяа хөдөө орон нутагт анхан шатны тусламж үйлчилгээ үзүүлдэг эрүүл мэндийн байгууллагад шууд гарч ажиллах боломжоор хангагдаж байна.

                    Энэхүү үйл ажиллагааны хүрээнд эмч эмнэлгийн мэргэжилтнүүд маань төгсөлтийн дараах үндсэн, төрөлжсөн, дээшлүүлэх сургалт, ерөнхий мэргэшил судлалын сургалт, мэргэжлийн зэрэг олгох үйл ажиллагаа, тасралтгүй сургалтын багц цаг бүрдүүлэлт, мэргэжлийн үйл ажиллагаа эрхлэх зөвшөөрлийн шалгалтын талаарх мэдээллийг нэг дороос авах таатай боломж бүрдэж байна.