Мэдээ:
  • Төрөлт: Улсын хэмжээнд 2018 оны эхний 6 сарын байдлаар 38 055 эх төрсөн нь өнгөрсөн оны мөн үеэс 2743 төрөлтөөр буюу 7.8 хувиар өссөн байна. Амьд төрсөн хүүхэд: 2018 оны эхний 6 сарын байдлаар улсын хэмжээнд 38 310 хүүхэд амьд төрсөн нь өнгөрсөн оны мөн үеэс 2774 хүүхдээр буюу 7.8 хувиар өсчээ. Амьд төрсөн хүүхдийн 19 716 буюу 51.5 хувь нь хүү, 18 594 буюу 48.5 хувь нь охин байна. Эхийн эндэгдэл: Улсын хэмжээнд 2018 оны эхний 6 сарын байдлаар эхийн эндэгдлийн 12 тохиолдол бүртгэгдэж, 100 000 амьд төрөлтөд 31.3 байгаа нь өнгөрсөн оны мөн үеэс 3 тохиолдол буюу 100 000 амьд төрөлтөд 6.0-оор өссөн байна. Нялхсын эндэгдэл: Улсын хэмжээнд нялхсын эндэгдлийн 529 тохиолдол бүртгэгдэж, 1000 амьд төрөлтөд 13.8 ногдож байгаа нь өнгөрсөн оны мөн үетэй харьцуулахад 1 тохиолдлоор өссөн хэдий ч 1000 амьд төрөлтөд 1.1-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2018 оны эхний 6 сарын байдлаар тав хүртэлх насны хүүхдийн эндэгдлийн 649 тохиолдол бүртгэгдэж, 1000 амьд төрөлтөд 16.9 ногдож байгаа нь өмнөх оны мөн үетэй харьцуулахад 24 тохиолдлоор нэмэгдсэн хэдий ч 1000 амьд төрөлтөд 0.7-оор буурсан үзүүлэлттэй байна. Нас баралт: 2018 оны эхний 6 сарын байдлаар нас баралтын 8515 тохиолдол бүртгэгдсэн нь өнгөрсөн оны мөн үеэс 770 тохиолдлоор өссөн байна. Нийт нас баралтын 5175 тохиолдол буюу 60.8 хувь нь эрэгтэй, 3340 буюу 39.2 хувь нь эмэгтэй байна. Халдварт өвчин: Улсын хэмжээнд 25 төрлийн 21 827 халдварт өвчний тохиолдол бүртгэгдэж, 10 000 хүн амд 68.7 ногдож байна. Өмнөх оны мөн үеэс 4250 тохиолдлоор буюу 10 000 хүн амд ногдох өвчлөл 16.6-оор буурсан байна.
1000 цагаан нөмрөгтөн чууллаа.

Эрүүл мэндийн тусламж, үйлчилгээнд нийтлэг тулгамдаж буй асуудлыг хэлэлцэж, шийдвэрлэх арга замыг тодорхойлох зорилгоор өнөөдөр Монгол улсын өнцөг булан бүрээс 1000 багийн болон сумын эмч, эрүүл мэндийн ажилтнууд хүрэлцэн ирж Төрийн ордноо чууллаа.

“1000 ЦАГААН НӨМРӨГТӨН” чуулга уулзалтын нээлтэд Монгол Улсын Ерөнхий сайд Ж.Эрдэнэбат оролцож, үг хэлэв. Тэрээр хэлэхдээ, МУ-ын Засгийн газраас иргэдийн эрүүл мэндийн тулгамдсан асуудлыг шуурхай шийдвэрлэхийн төлөө ажиллаад зогсохгүй, эмч эмнэлгийн мэргэжилтэн та бүхний ажлын ачааллыг багасгаж, эмнэлгийн тусламж үйлчилгээг иргэдэд хөнгөн шуурхай үзүүлэх боломж бүрдүүлсэн, эрүүл мэндийн салбарын санхүүжилтийг нэмэгдүүлсэн, эрүүл мэндийн эрсдэлийн улмаас гадаад улс орнууд руу урсах мөнгөний урсгалыг бууруулсан, шинэ технологи, инновацийг нэвтрүүлэн нутагшуулж ажиллаж байна хэмээн цохон тэмдэглэлээ.

Эрүүл мэндийн сайд А.Цогцэцэг “Хамтдаа шийдвэрлэе” сэдвээр эрүүл мэндийн салбарын өнөөгийн байдал, авч хэрэгжүүлж буй бодлого, үйл ажиллагаа, цаашид хэрэгжүүлэх ажлынхаа талаар илтгэл тавилаа. Тэрээр илтгэлдээ, Та бид өнөөдөр МУ-ын хүн амын эрүүл мэндийг дэмжих, хамгаалах чиглэлээр эрүүл мэндийн салбарт олсон амжилт, хийж гүйцэтгэсэн ажил, цаашид нэн тэргүүнд авч хэрэгжүүлэх арга хэмжээ, анхаарах асуудлынхаа талаар харилцан ярилцаж санал бодлоо солилцон, тодорхой шийдвэр, уриалгыг гаргахаар хуран цугларлаа.

Өнөөдөр эрүүл мэндийн салбар ард түмнийхээ итгэлийг даасан, талархлыг хүлээсэн салбар болох уу? Эсвэл шалтаг тоочсон зовлон ярьсан хэвээрээ байх уу? гэдэг нь энд цугларсан “Мянган цагаан нөмрөгтөн” Та биднээс ихээхэн шалтгаална. Эрүүл мэндийн салбарын удирдах ажилтан, эмнэлгийн мэгргэжилтэн, ажилтан бид бүхнээс шалтгаалах мөнгөгүйгээр, чин сэтгэлээсээ хийж бүтээх ажил их байна. Удирдлага, эмнэлгийн мэргэжилтэн, ажилтан, хувь хүний ажлын зохион байгуулалт, арга барил гэдэг нь юугаар ч үнэлэмгүй хөрөнгө оруулалт гэдгийг дурьдахыг хүсч байна гэдгийг онцлон хэлэв.

2016 оны байдлаар нийт 3500 орчим эрүүл мэндийн байгууллагуудад 10 мянга гаруй их эмч ажиллаж байна. Тэдний 59.9 хувь нь УБ хотод, 40.1 хувь нь аймаг, орон нутагт ажиллаж байгаа юм.

2016 онд манай улсад 77803  эх амаржиж, 78194 хүүхэд шинээр мэндлэн, давхардсан тоогоор 17 006 503 хүн амбулаториор үзлэг хийлгэж, 849 051 хүн эмнэлэгт хэвтэн эмчлүүлжээ.